គណៈគ្រប់គ្រង

លោក Hyunrae KIM

អនុប្រធាននាយកប្រតិបត្តិ

លោក Hyunrae KIM ជាធនាគារិកដែលមានបទពិសោធន៍ក្នុងវិស័យធនាគារ និងបញ្ចប់បរិញ្ញាបត្រផ្នែកសេដ្ឋកិច្ចពីសាកលវិទ្យាល័យ Sejong ប្រទេសកូរ៉េ ។ លោកមានជំនាញក្នុងការរៀបចំផែនការយុទ្ធសាស្ត្រ ការសម្របសម្រួលធុរកិច្ច និងសេវាធនាគារអន្តរជាតិ ជិត 3 ទសវត្សរ៍។

លោកបានចាប់ផ្តើមអាជីពនៅធនាគារ Kookmin Bank ហើយជាបន្តបន្ទាប់បានកាន់តំណែងជាអ្នកដឹកនាំសំខាន់ៗ។ ពីឆ្នាំ 2015 ដល់ ឆ្នាំ 2016 លោកបានបម្រើការជាប្រធានក្រុមនៃនាយកដ្ឋានយុទ្ធសាស្ត្រ និងផែនការ នៅ Kookmin Bank ក្នុងទីក្រុងសេអ៊ូល ប្រទេសកូរ៉េ។ បន្ទាប់មក លោកត្រូវបានដំឡើងឋានៈជាអ្នកគ្រប់គ្រងទូទៅនៃនាយកដ្ឋានផែនការ និងសម្របសម្រួល ចាប់ពីឆ្នាំ 2017 មក ហើយលោកបានដើរតួនាទីយ៉ាងសំខាន់ក្នុងការធ្វើឱ្យស្របគ្នារវាងគោលដៅសាជីវកម្មជាមួយនឹងដំណើការធុរកិច្ច។

ចាប់ពីឆ្នាំ 2021 លោក Kim ត្រូវបានតែងតាំងជាអ្នកគ្រប់គ្រងទូទៅនៃធនាគារ Kookmin Bank នៅទីក្រុងហាណូយ ប្រទេសវៀតណាម ហើយលោកបានដឹកនាំការពង្រីកអាជីវកម្មក្នុងតំបន់របស់ធនាគារ និងការពង្រឹងវត្តមាននៅទីផ្សារអាស៊ីអាគ្នេយ៍បានដោយជោគជ័យ។

នៅក្នុងខែកុម្ភៈ ឆ្នាំ 2025 លោកត្រូវបានតែងតាំងជា អនុប្រធាននាយកប្រតិបត្តិ ធនាគារ ខេប៊ីប្រាសាក់ ម.ក នៅប្រទេសកម្ពុជា ព្រមជាមួយនឹងការពាំនាំមកនូវបទពិសោធន៍ដ៏ប៉ិនប្រសប់ ដើម្បីរួមចំណែកជំរុញកំណើន និងឧត្តមភាពប្រតិបត្តិការរបស់ធនាគារ។

លោក Seong Myeong HAM

អនុប្រធាននាយកប្រតិបត្តិទទួលបន្ទុកហិរញ្ញវត្ថុ

លោក Seong Myeong HAM មានបរិញ្ញាបត្រជាន់ខ្ពស់ផ្នែកហិរញ្ញវត្ថុ និងបរិញ្ញាបត្រផ្នែកធនធានព្រៃឈើ។

លោកក៏បានបញ្ចប់វគ្គបណ្តុះបណ្តាលផ្សេងៗ និងទទួលបានបទពិសោធន៍យ៉ាងទូលំទូលាយក្នុងផ្នែកប្រតិបត្តិការ និងគ្រប់គ្រងធនាគារ ទាំងនៅក្នុងប្រទេសកូរ៉េ និងក្រៅប្រទេស។

លោកមានបទពិសោធន៍ជាង 20 ឆ្នាំ នៅធនាគារគូកមីន នៅក្នុងផ្នែកផ្សេងៗដូចជា ហិរញ្ញវត្ថុ គណនេយ្យ សោធននិវត្តន៍ ការលក់ និងធុរកិច្ចក្រៅប្រទេស។

លោកធ្លាប់បម្រើការជានាយកគាំទ្រកំណើនសកលនៅធនាគារ គូកមីន ដោយទទួលបន្ទុកត្រួតពិនិត្យលើប្រតិបត្តិការក្នុងប្រទេសកម្ពុជា និងឥណ្ឌូនេស៊ី។

លោកបានចូលបម្រើការងារនៅធនាគារ ខេប៊ីប្រាសាក់ តាំងពីដើមខែមេសា ឆ្នាំ 2025 ក្នុងតួនាទីជាអនុប្រធាននាយកប្រតិបត្តិទទួលបន្ទុកហិរញ្ញវត្ថុ។

លោក គង់ ស៊ាន

អនុប្រធាននាយកប្រតិបត្តិទទួលបន្ទុកប្រតិបត្តិការ

លោក គង់ ស៊ាន បានបញ្ចប់ការសិក្សាថ្នាក់បរិញ្ញាបត្រជាន់ខ្ពស់ និងថ្នាក់បរិញ្ញាបត្រឯកទេសគ្រប់គ្រងទូទៅ។ ចាប់តាំងពីឆ្នាំ 2001 មក លោកបានចូលរួមក្នុងវគ្គបណ្ដុះបណ្ដាលអភិវឌ្ឍអាជីពជាច្រើន ទាំងនៅក្នុងប្រទេស និងក្រៅប្រទេស​ លើជំនាញហិរញ្ញវត្ថុ ការគ្រប់គ្រង និងប្រតិបត្តិការធនាគារ។

លោកបានចាប់ផ្ដើមអាជីពក្នុងវិស័យធនាគារក្នុងឆ្នាំ 2001 ដោយមានមុខតំណែងផ្សេងៗជាច្រើនក្នុងផ្នែកប្រតិបត្តិការ និងរតនាភិបាល មុនពេលក្លាយជានាយកការិយាល័យប្រតិបត្តិការហិរញ្ញវត្ថុនៅធនាគារពាណិជ្ជមួយរហូតដល់ដើមឆ្នាំ 2011។ ចាប់តាំងពីឆ្នាំនោះមក លោកបានចូលបម្រើការងារនៅគ្រឹះស្ថានមីក្រូហិរញ្ញវត្ថុ ប្រាសាក់ ក្នុងមុខតំណែងជា នាយកនាយកដ្ឋានអភិវឌ្ឍន៍ផលិតផល។ នៅឆ្នាំ 2012 លោកត្រូវបានតែងតាំងជា នាយកនាយកដ្ឋានរតនាភិបាល ជាកន្លែងដែលលោកបានដើរតួនាទីយ៉ាងសំខាន់ក្នុងការជំរុញការពង្រឹងហិរញ្ញវត្ថុ ការគ្រប់គ្រងតារាងតុល្យការ និងការបង្កើនប្រសិទ្ធភាពប្រតិបត្តិការរបស់ស្ថាប័ន។

បច្ចុប្បន្ននេះ លោក គង់ ស៊ាន មានតួនាទីជា អនុប្រធាននាយកប្រតិបត្តិទទួលបន្ទុកប្រតិបត្តិការ នៃធនាគារ ខេប៊ីប្រាសាក់ ម.ក ដោយលោកត្រួតពិនិត្យលើប្រតិបត្តិការ ការអនុវត្តយុទ្ធសាស្ត្រ និងប្រសិទ្ធភាពរបស់ស្ថាប័ន ដែលរួមចំណែកដល់ការបន្តរីកចម្រើនរបស់ធនាគារ និងភាពជាអ្នកដឹកនាំក្នុងវិស័យហិរញ្ញវត្ថុរបស់ប្រទេសកម្ពុជា។

លោក ប៉ែន សុវណ្ណសុខស៊ីថា

អនុប្រធាននាយកប្រតិបត្តិទទួលបន្ទុកផលិតផល

លោក ប៉ែន សុវណ្ណសុខស៊ីថា បញ្ចប់ថ្នាក់បរិញ្ញាបត្រជាន់ខ្ពស់ផ្នែកគ្រប់គ្រងការអភិវឌ្ឍ និងបញ្ចប់ការសិក្សាបរិញ្ញាបត្រជាន់ខ្ពស់ផ្នែកគ្រប់គ្រងអាជីវកម្ម។ លោកបានបញ្ចប់ថ្នាក់បរិញ្ញាបត្រវិទ្យាសាស្រ្តសេដ្ឋកិច្ច ឯកទេសធនាគារ និងហិរញ្ញវត្ថុ។ លោកមានបទពិសោធន៍ជាង 15 ឆ្នាំក្នុងវិស័យមីក្រូហិរញ្ញវត្ថុនិងធនាគារ ការអភិវឌ្ឍផលិតផល ការគ្រប់គ្រងទីផ្សារ សេវាអតិថិជន កិច្ចការពារអតិថិជន និងចំណេះដឹងហិរញ្ញវត្ថុ។

លោកបានចាប់ផ្តើមអាជីពការងារជាមន្ត្រីឥណទាននិងទីផ្សារ បន្ទាប់មកបានកាន់តួនាទីផ្សេងៗជាច្រើនរួមមាន អ្នកឯកទេសលទ្ធភាពទទួលបានហិរញ្ញវត្ថុ ទីប្រឹក្សាជាន់ខ្ពស់ការងារឥណទាន អ្នកឯកទេសលទ្ធផលសង្គម និងនាយកគម្រោង នៅស្ថាប័នក្នុងស្រុក និងអន្តរជាតិ។ លោកចូលបម្រើការងារនៅប្រាសាក់នៅដើមឆ្នាំ 2014 ក្នុងតួនាទីជា នាយករង នាយកដ្ឋានទីផ្សារនិងទំនាក់ទំនង។ លោកត្រូវបានដំឡើងតួនាទីជា នាយក នាយកដ្ឋានទីផ្សារនិងទំនាក់ទំនង នៅឆ្នាំ 2016 ។

បច្ចុប្បន្ននេះ លោកមានតួនាទីជា អនុប្រធាននាយកប្រតិបត្តិទទួលបន្ទុកផលិតផល នៃធនាគារ ខេប៊ីប្រាសាក់ ម.ក ។

លោក ភោគ វណ្ណឌី

អនុប្រធាននាយកប្រតិបត្តិទទួលបន្ទុកព័ត៌មានវិទ្យា

លោក ភោគ វណ្ណឌី ទទួលបានបរិញ្ញាបត្រជាន់ខ្ពស់ផ្នែកវិស្វកម្ម និងវិទ្យាសាស្រ្តកុំព្យូទ័រ ពីសាកលវិទ្យាល័យភូមិន្ទភ្នំពេញ។ ចាប់តាំងពីឆ្នាំ 2001 មក លោកបានចូលរួមវគ្គបណ្តុះបណ្តាល និងសិក្ខាសាលាជាច្រើនទាក់ទងនឹងការអភិវឌ្ឍបច្ចេកវិទ្យាព័ត៌មានវិទ្យា ការគ្រប់គ្រងគម្រោង ដំណោះស្រាយប្រព័ន្ធធនាគារស្នូល ប្រតិបត្តិការមីក្រូហិរញ្ញវត្ថុ និងធនាគារទាំងក្នុងនិង ក្រៅប្រទេស។

លោកមានបទពិសោធន៍ច្រើនជាង 20 ឆ្នាំ នៅក្នុងវិស័យផ្សេងៗដូចជា ការអភិវឌ្ឍកម្មវិធី បច្ចេកវិទ្យាព័ត៌មាន និងការគ្រប់គ្រងទិន្នន័យ សុវត្ថិភាពតាមអ៊ីនធឺណិត និងការបង្ការហានិភ័យ ការប្រតិបត្តិប្រព័ន្ធធនាគារស្នូល ការដំឡើងនិង បច្ចុប្បន្នភាពប្រព័ន្ធ ការអភិវឌ្ឍកម្មវិធីទូរស័ព្ទ ព្រមទាំងការគ្រប់គ្រង និងយុទ្ធសាស្ត្រធុរកិច្ចព័ត៌មានវិទ្យា។

លោកចាប់ផ្តើមអាជីពការងារជាអ្នកអភិវឌ្ឍផ្នែកទន់នៅដើមឆ្នាំ 2000 ។ បន្ទាប់មកត្រូវបានដំឡើងតួនាទីជាប្រធានអ្នកអភិវឌ្ឍ មុនពេលបម្រើការងារនៅវិស័យមីក្រូហិញ្ញវត្ថុនៅឆ្នាំ 2004 ក្នុងតួនាទីជានាយកបច្ចេកវិទ្យាព័ត៌មាន។ បន្តមកលោកបានបម្រើការងារនៅគ្រឹះស្ថានមីក្រូហិញ្ញវត្ថុប្រាសាក់ នៅខែមិថុនា ឆ្នាំ 2010 ជានាយករងនាយកដ្ឋានគាំទ្រប្រព័ន្ធធនាគារស្នូល និងបច្ចេកវិទ្យាព័ត៌មាន។ លោកត្រូវបានដំឡើងតួនាទីជានាយកនាយកដ្ឋានប្រព័ន្ធធនាគារស្នូល និងបច្ចេកវិទ្យាព័ត៌មាននៅខែកក្កដា ឆ្នាំ 2013 ។

បច្ចុប្បន្នលោកមានតួនាទីជាអនុប្រធាននាយកប្រតិបត្តិទទួលបន្ទុកបច្ចេកវិទ្យាព័ត៌មាន នៃធនាគារ ខេប៊ីប្រាសាក់ ម.ក។

លោក ស៊ុម ស៊ីណាត

អនុប្រធាននាយកប្រតិបត្តិទទួលបន្ទុកអាជីវកម្ម

លោក ស៊ុម ស៊ីណាត បានបញ្ចប់ថ្នាក់បរិញ្ញាបត្រជាន់ខ្ពស់ផ្នែកគ្រប់គ្រងធុរកិច្ច ក្នុងឆ្នាំ 2007 បរិញ្ញាបត្រគ្រប់គ្រងធុរកិច្ច ក្នុងឆ្នាំ 2005 និងសញ្ញាបត្រជាន់ខ្ពស់ផ្នែកគណនេយ្យ ក្នុងឆ្នាំ 2003 ។ លោកបានចូលរួមវគ្គបណ្តុះបណ្តាល និងសិក្ខាសាលាជាច្រើនដែលរួមចំណែកក្នុងការកសាងតួនាទីរបស់លោកក្នុងវិស័យធនាគារ និងហិរញ្ញវត្ថុ ដូចជាជំនាញគ្រប់គ្រងប្រកបដោយប្រសិទ្ធភាពសម្រាប់គ្រឹះស្ថានមីក្រូហិរញ្ញវត្ថុ ការគ្រប់គ្រងហិរញ្ញវត្ថុពីហុងកុង ការគ្រប់គ្រងហានិភ័យនៃគ្រឹះស្ថានមីក្រូហិរញ្ញវត្ថុ ការគ្រប់គ្រង និងរៀបចំផែនការយុទ្ធសាស្រ្ត (EDA) ការវាយតម្លៃលទ្ធផលការងារបុគ្គលិកប្រកបដោយប្រសិទ្ធភាព សញ្ញាបត្រគ្រប់គ្រង (ITC Boulder Italy) ការកៀរគរប្រាក់សន្សំ ការគ្រប់គ្រងមូលនិធិនៅក្នុងស្ថាប័នហិរញ្ញវត្ថុ និងវគ្គសិក្សាផ្សេងទៀតទាំងក្នុងស្រុក និងក្រៅប្រទេស។

លោកមានបទពិសោធន៍ជាង 20 ឆ្នាំក្នុងវិស័យធនាគារ និងហិរញ្ញវត្ថុ ដោយលោកចាប់ផ្តើមអាជីពការងារនៅគ្រឹះស្ថានមីក្រូហិញ្ញវត្ថុប្រាសាក់ចាប់ពីឆ្នាំ 2002 ដល់ឆ្នាំ 2015 ក្នុងតួនាទីជា មន្ត្រីឥណទាន នាយកសាខា នាយកនាយកដ្ឋានគាំទ្រសាខា និងនាយកនាយកដ្ឋានប្រតិបត្តិការ។ បន្ទាប់មកលោកបានទៅបម្រើការងារនៅគ្រឹះស្ថានហិញ្ញវត្ថុផ្សេងក្នុងតួនាទីជា អគ្គនាយក ពីខែមេសា ឆ្នាំ 2015 ដល់ខែមិថុនា ឆ្នាំ 2017 និងជានាយកប្រតិបត្តិទទួលបន្ទុកប្រតិបត្តិការ ពីខែមិថុនា ឆ្នាំ 2019 ដល់ខែមីនា ឆ្នាំ 2023 ។ លោកបានចូលមកបម្រើការសារជាថ្មីនៅប្រាសាក់ក្នុងខែមេសា ឆ្នាំ 2023 ជាអនុប្រធាននាយកប្រតិបត្តិទទួលបន្ទុកឥណទាន។

លោកត្រូវបានតែងតាំងជា អនុប្រធាននាយកប្រតិបត្តិទទួលបន្ទុកអាជីវកម្ម នៃធនាគារ ខេប៊ីប្រាសាក់ ចាប់តាំងពីខែកុម្ភៈ ឆ្នាំ 2026 ។

លោក ហឿន ហុន្នី

អនុប្រធាននាយកប្រតិបត្តិទទួលបន្ទុកធនធានមនុស្ស

លោក ហឿន ហុន្នី បានបញ្ចប់ការសិក្សាថ្នាក់បរិញ្ញាបត្រជាន់ខ្ពស់រដ្ឋបាលសាធារណៈ និងបានបញ្ចប់ការសិក្សាថ្នាក់បរិញ្ញាបត្រលើជំនាញគ្រប់គ្រងទូទៅ។ លោកបានចូលរួមក្នុងវគ្គបណ្តុះបណ្តាលការអភិវឌ្ឍជំនាញជាច្រើនលើផ្នែកគ្រប់គ្រងធនធានមនុស្សទាំងក្នុងនិងក្រៅប្រទេស។

លោកមានបទពិសោធន៍ជាង 20 ឆ្នាំ ក្នុងការអភិវឌ្ឍគ្រប់គ្រងធនធានមនុស្ស។ លោកចាប់ផ្តើមបម្រើការងារនៅប្រាសាក់ជាគ្រូបណ្តុះបណ្តាលនិងអ្នកគ្រប់គ្រងមន្រ្តីឥណទាននៅឆ្នាំ 1996 រហូតដល់ឆ្នាំ 1998 ។ នៅឆ្នាំ 2008 លោកបានត្រលប់មកបម្រើការងារនៅបា្រសាក់ជាថ្មីក្នុងតួនាទីជាមន្រ្តីជាន់ខ្ពស់គាំទ្រសាខា និងត្រូវបានដំឡើងតួនាទីជាប្រធានផ្នែកគ្រប់គ្រងបុគ្គលិកក្នុងឆ្នាំ 2009 ហើយលោកត្រូវបានដំឡើងតួនាទីជា នាយក នាយកដ្ឋានបុគ្គលិកនៅឆ្នាំ 2011 ។

បច្ចុប្បន្ននេះ លោក មានតួនាទីជា អនុប្រធាននាយកប្រតិបត្តិទទួលបន្ទុកធនធានមនុស្ស នៃធនាគារ ខេប៊ីប្រាសាក់ ម.ក ។

លោក Ki Jeong HONG

អនុប្រធាននាយកប្រតិបត្តិទទួលបន្ទុកគ្រប់គ្រងហានិភ័យ

លោក Ki Jeong HONG ជាអ្នកគ្រប់គ្រងហានិភ័យហិរញ្ញវត្ថុ ដែលមានការទទួលស្គាល់ពីសមាគមសកលនៃអ្នកជំនាញគ្រប់​គ្រង​ហានិភ័យ​ ដែលជាសមាគមវិជ្ជាជីវៈឈានមុខគេរបស់ពិភពលោកសម្រាប់អ្នកជំនាញគ្រប់គ្រងហានិភ័យ។ លោកក៏បានបញ្ចប់ការសិក្សាថ្នាក់បរិញ្ញាបត្រគ្រប់គ្រងពាណិជ្ជកម្ម និងថ្នាក់បរិញ្ញាបត្រជាន់ខ្ពស់ផ្នែកហិរញ្ញវត្ថុ ជំនាញគ្រប់គ្រងហិរញ្ញវត្ថុ។

លោក HONG ត្រូវបានទទួលស្គាល់ចំពោះជំនាញរបស់លោកក្នុងការ​គ្រប់គ្រង​ហានិភ័យ​ ពេលលោកបម្រើការនៅនាយកដ្ឋានគ្រប់គ្រងហានិភ័យ នៅធនាគារ KB Kookmin Bank ជាទីដែលលោកទទួលខុសត្រូវលើការគ្រប់គ្រងហានិភ័យទីផ្សារអស់រយៈពេលជាង 5 ឆ្នាំ។

ដោយប្រើប្រាស់បទពិសោធន៍របស់លោកក្នុងតួនាទីទាក់ទងនឹងទីផ្សារមូលធន លោកបានបម្រើការនៅក្នុងនាយកដ្ឋានរតនាភិបាល នាយកដ្ឋានទ្រព្យសកម្ម និងបំណុល និងនាយកដ្ឋានផែនការហិរញ្ញវត្ថុ ជាទីដែលលោកបានដឹកនាំសកម្មភាពគ្រប់គ្រងទ្រព្យសកម្ម និងបំណុល (ALM) ទូទាំងធនាគារអស់រយៈពេល 9 ឆ្នាំ។ ក្នុងអំឡុងពេលនោះ លោកបានរួមចំណែកយ៉ាងសំខាន់ដល់ការកែលម្អក្របខ័ណ្ឌ​គ្រប់គ្រង​ហានិភ័យ​សន្ទនីយភាព​ និងអត្រាការប្រាក់របស់ធនាគារ KB Kookmin Bank ។

លោក HONG ក៏ទទួលបានបទពិសោធន៍យ៉ាងច្រើនក្នុងវិស័យធនាគារសាជីវកម្ម ខណៈពេលបម្រើការងារនៅក្នុងសាខាមួយ ជាទីដែលលោកទទួលខុសត្រូវលើប្រតិបត្តិការហិរញ្ញវត្ថុសាជីវកម្ម រួមទាំងការវាយតម្លៃ និងការគ្រប់គ្រងឥណទាន។

ចក្ខុវិស័យយុទ្ធសាស្ត្រ និងសមិទ្ធផលគួរឱ្យកត់សម្គាល់របស់លោក បានអនុញ្ញាតឱ្យលោកទទួលបានការតែងតាំងជាអនុប្រធាននាយកប្រតិបត្តិ​ទទួល​បន្ទុក​គ្រប់គ្រង​ហានិភ័យ នៃ ធនាគារ ខេប៊ីប្រាសាក់ នៅក្នុងខែមករា ឆ្នាំ 2026 ដែលជាកន្លែងដែលលោកកំពុងបម្រើការនាពេលបច្ចុប្បន្ន។